«Қыз Жібек» – мәңгілік махаббат жыры

12.04.2018

Астана қаласы әкімдігі «Жастар» театрында жаңа қойылым.  «Рухани жаңғыру» аясында Астананың 20 жылдығына орай  12-15 сәуір күндері Ғабит Мүсіреповтің «Қыз жібек» мюзиклінің премьерасын көрермен назарына ұсынады.

«Қыз Жібек» – мәңгілік махаббат жыры. Шекті руының айдай сұлу аруы Жібек пен Жағалбайлы руының батыры, сері Төлегеннің арасында тұтанған сезім шоғы кіршіксіз махаббатқа ұласады. Алайда махаббат барда қызғаныштың да қатар жүруі өмір заңдылығы емес пе? Жібек аруға бұрыннан ғашық сол ауылдың Бекежан есімді батыры да сұлудан дәмелі көңілін жасырмай, махаббат үшін ашық айқасқа түседі. Қайшылыққа толы күрестің соңы орны толмас өкінішке ұласады…     

Ғасырды ғасырға жалғаған жауһар жырдың Жастар театры сахнасында жандану мен тіл қату әдісі де, «сөйлеу» қалыбы да өзгеше. Евгений Брусиловскийдің замануи үнде жаңаша өңделген классикалық музыкасы көрерменін формалық, идеялық һәм көркемдік ерекшелігімен баурайды. Қазақтың байырғы салты – бастаңғы стилінде өрбитін мюзиклде негізінен жастардың сыры мен мұңы, арманы мен мұраты, ең бастысы, кіршіксіз махаббаты алға шығады. Ғажайып музыка тілі арқылы сезім күйін шертер қойылым көрерменін бей-жай қалдырмайды.

Спектакльдің қоюшы режиссері – Нұрқанат Жақыпбай, Қазақстанның еңбек сіңірген қайраткері, қоюшы суретші – Ерлан Тұяқов, хормейстер – Гүлмира Құттыбадамова, балетмейстер – Шырын Мұстафина, музыканы әрлеуші – Ерболат Құдайберген, Жандаулет Батай.

Астана қ. Мәдениет
және спорт басқармасы